ബംഗളൂരു: കുട്ടയില് പ്രായപൂർത്തിയാകാത്ത പെണ്കുട്ടികളെ കൂട്ടബലാത്സംഗത്തിനിരയാക്കിയ കേസില് മൂന്ന് മലയാളികള് ഉള്പ്പെടെ അഞ്ചു പേരെ അറസ്റ്റ് ചെയ്തു. വയനാട് തോല്പ്പെട്ടി സ്വദേശികളായ രാഹുല് (21), മനു (25), സന്ദീപ് (27), കർണാടക നത്തംഗള സ്വദേശികളായ നവീന്ദ്ര (24), അക്ഷയ് (27) എന്നിവരെയാണ് അറസ്റ്റ് ചെയ്തത്.
കഴിഞ്ഞ ദിവസമായിരുന്നു കേസിനാസ്പദമായ സംഭവം നടന്നത്. പ്രായപൂർത്തിയാകാത്ത രണ്ട് പെണ്കുട്ടികളെയാണ് പ്രതികള് കാറില് തട്ടിക്കൊണ്ടുപോയത്. ഇതില് ഒരു പെണ്കുട്ടിയെ അഞ്ചുപേരും ചേർന്ന് കൂട്ടബലാത്സംഗത്തിനിരയാക്കുകയായിരുന്നു. ലിഫ്റ്റ് നല്കാമെന്ന് പറഞ്ഞാണ് പ്രതികള് പെണ്കുട്ടികളെ കാറില് കയറ്റിയത്. പിന്നാലെ ഇവരുമായി നത്തംഗളയിലെ കാപ്പിത്തോട്ടത്തിലേക്ക് പോവുകയും ഇവിടെവെച്ച് ഒരു പെണ്കുട്ടിയെ പ്രതികള് ബലാത്സംഗത്തിനിരയാക്കുകയുമായിരുന്നു.
പിന്നാലെ രണ്ടാമത്തെ പെണ്കുട്ടിയെയും പീഡിപ്പിക്കാൻ ശ്രമിച്ചെങ്കിലും പെണ്കുട്ടി ഇവരില്നിന്ന് ഓടിരക്ഷപ്പെട്ടു. തുടർന്ന് പെണ്കുട്ടി നാട്ടുകാരെ വിവരമറിയിക്കുകയായിരുന്നു. നാട്ടുകാർ ഓടിയെത്തിയതോടെ പ്രതികള് രക്ഷപ്പെടാൻ ശ്രമിക്കുകയും തുടർന്ന് ഇവരുടെ കാർ നാട്ടുകാർ തടഞ്ഞിട്ടതോടെ പെണ്കുട്ടിയെ ഉപേക്ഷിച്ച് പ്രതികള് കടന്നുകളയുകയുമായിരുന്നു. തുടർന്ന് പൊലീസ് നടത്തിയ അന്വേഷണത്തിലാണ് പ്രതികളെ പിടികൂടിയത്.
