കഴിഞ്ഞ കുറച്ച് വർഷങ്ങളായി, ഇന്ത്യൻ ഉപഭോക്താക്കൾക്കിടയിൽ ഇലക്ട്രിക് കാറുകളുടെ ഡിമാൻഡിൽ തുടർച്ചയായ വർദ്ധനവ് ഉണ്ടായിട്ടുണ്ട്. ഇത് കണക്കിലെടുത്ത് പല കമ്പനികളും പുതിയ ഇലക്ട്രിക് കാറുകൾ പുറത്തിറക്കാനുള്ള ഒരുക്കത്തിലാണ്. ഈ വിഭാഗത്തിൽ ടാറ്റ മോട്ടോഴ്സിന് ഇപ്പോഴും ഏകപക്ഷീയമായ ആധിപത്യമുണ്ട്. ഇന്ത്യയിലെ മൊത്തം ഇലക്ട്രിക് കാർ വിൽപ്പനയിൽ ടാറ്റ മോട്ടോഴ്സിന് മാത്രം 65 ശതമാനത്തിലധികം വിഹിതമുണ്ട്. ഇപ്പോഴിതാ ഇനി വരും ദിവസങ്ങളിൽ ഇന്ത്യൻ കാർ നിർമ്മാതാക്കളായ മഹീന്ദ്ര രണ്ട് പുതിയ ഇലക്ട്രിക് കാറുകൾ അവതരിപ്പിക്കാൻ പോകുന്നു. മഹീന്ദ്രയുടെ ഈ രണ്ട് പുതിയ ഇലക്ട്രിക് കാറുകളുടെ സാധ്യമായ ഫീച്ചറുകളെക്കുറിച്ചും ഡ്രൈവിംഗ് റേഞ്ചിനെക്കുറിച്ചും അറിയാം.
മഹീന്ദ്ര 3XO EV
മഹീന്ദ്ര തങ്ങളുടെ ജനപ്രിയ എസ്യുവി XUV 300 ൻ്റെ പുതുക്കിയ പതിപ്പ് അടുത്തിടെ പുറത്തിറക്കി, അത് XUV 3X0 എന്ന് പുനർനാമകരണം ചെയ്യപ്പെട്ടു. ലോഞ്ച് ചെയ്ത ഉടൻ തന്നെ മഹീന്ദ്ര XUV 3X0 ന് വൻ ബുക്കിംഗ് ലഭിക്കുന്നുണ്ട്. ഇപ്പോൾ കമ്പനി മഹീന്ദ്ര XUV 3X0 ൻ്റെ ഇലക്ട്രിക് പതിപ്പും അവതരിപ്പിക്കാൻ പോകുന്നു. നവംബറിൽ കമ്പനി മഹീന്ദ്ര XUV 300 EV യുടെ ഉത്പാദനം ആരംഭിക്കുമെന്നാണ് റിപ്പോര്ട്ടുകൾ. മഹീന്ദ്ര XUV 3XO-യിൽ 35kWh ബാറ്ററി നൽകാൻ സാധ്യതയുണ്ട്. എങ്കിലും, അതിൻ്റെ റേഞ്ച് ഇതുവരെ വെളിപ്പെടുത്തിയിട്ടില്ല. മഹീന്ദ്ര XUV 3X0 EV യുടെ ഏകദേശ വില 14 ലക്ഷം മുതൽ 17 ലക്ഷം രൂപ വരെയാണ്.
മഹീന്ദ്ര XUV.e8
മഹീന്ദ്ര തങ്ങളുടെ ജനപ്രിയ എസ്യുവി എക്സ്യുവി 700-ൻ്റെ ഓൾ-ഇലക്ട്രിക് വേരിയൻ്റ് പുറത്തിറക്കാനും ഒരുങ്ങുന്നു. കമ്പനിയുടെ ഈ ഓൾ-ഇലക്ട്രിക് എസ്യുവിക്ക് മഹീന്ദ്ര XUV.e8 എന്ന് പേരിട്ടു. നിലവിലെ കലണ്ടർ വർഷം ഡിസംബറോടെ കമ്പനിക്ക് മഹീന്ദ്ര XUV.E8 പുറത്തിറക്കാൻ കഴിയുമെന്നാണ് വിവിധ റിപ്പോർട്ടുകൾ അവകാശപ്പെടുന്നത്. മഹീന്ദ്രയുടെ വരാനിരിക്കുന്ന ഇലക്ട്രിക് എസ്യുവിക്ക് 60kWh, 80kWh ബാറ്ററി പാക്ക് നൽകും. മഹീന്ദ്രയിൽ നിന്നുള്ള ഈ ഇലക്ട്രിക് എസ്യുവിക്ക് ഒറ്റ ചാർജിൽ ഉപഭോക്താക്കൾക്ക് ഏകദേശം 450 കിലോമീറ്റർ റേഞ്ച് വാഗ്ദാനം ചെയ്യാൻ കഴിയും. ഈ ഇലക്ട്രിക് എസ്യുവിയുടെ ഇൻ്റീരിയറിൽ മൂന്ന് 12.3 ഇഞ്ച് സ്ക്രീനുകൾ, ചതുരാകൃതിയിലുള്ള എസി വെൻ്റുകൾ, ടച്ച് സെൻസിറ്റീവ് എച്ച്വിഎസി കൺട്രോളുകൾ തുടങ്ങിയ സവിശേഷതകൾ ഉണ്ടാകും.
