തൃശൂരില്‍ ബേക്കറി അടിച്ചു തകര്‍ത്ത സംഭവത്തിലെ പ്രതിയെ പൊലീസ് വിട്ടയച്ചതായി ആരോപണം. കീറി ഒട്ടിച്ച 50 രൂപാ നോട്ട് സ്വീകരിക്കാത്തതിന് പ്രതി ബേക്കറി അടിച്ചുതകര്‍ത്തതായാണ് പരാതി. സംഭവത്തിന്റെ സിസിടിവി ദൃശ്യങ്ങള്‍ ഇതോടകം വൈറലായിട്ടുണ്ട്. കഴിഞ്ഞ ദിവസം രാത്രി 8.30ന് വരന്തരപ്പിള്ളിയിലായിരുന്നു സംഭവം.
മണ്ണൂത്തി സ്വദേശി വിനോദിന്റെ ഉടമസ്ഥതയിലുള്ള ശങ്കര സ്‌നാക്‌സില്‍ ആയിരുന്നു അതിക്രമം നടന്നത്. വരന്തരപ്പിള്ളി ഇല്ലിക്കല്‍ ജോയിയാണ് അക്രമത്തിന് പിന്നിലെന്ന് ബേക്കറി ഉടമ നല്‍കിയ പരാതിയില്‍ പറയുന്നു. ഇയാള്‍ കടയില്‍ നല്‍കിയ കീറി ഒട്ടിച്ച 50 രൂപാ നോട്ട് സ്വീകരിക്കാത്തതിനെ തുടര്‍ന്ന് ആക്രമണം നടത്തുകയായിരുന്നു.
തുടര്‍ന്ന് ബേക്കറി ഉടമ നല്‍കിയ പരാതിയില്‍ പൊലീസ് പ്രതിയെ പിടികൂടി. എന്നാല്‍ വരന്തരപ്പിള്ളി പൊലീസ് പ്രതിയെ വിട്ടയച്ചെന്നാണ് ആരോപണം. നാല് ലക്ഷം രൂപയുടെ നഷ്ടമാണ് പ്രതിയുടെ ആക്രമണത്തില്‍ ഉണ്ടായതെന്ന് ബേക്കറി ഉടമ പറയുന്നു.
